January 24, 2024

"Abunəlik ödənişlərini dəstəkləyə bilən tək ödəniş sistemi Odero oldu" - Yaşar Əhmədov | Metaflix platformasının CEO-su.

Günümüzdə istədiyimiz film və ya serialı izləmək üçün onun yayımlanacağı günü və saatı gözləməyə ehtiyac qalmayıb. Onlayn kino platformalarının izləyici sayı ənənəvi TV izləyici sayını sürətlə əvəz edir. Kinosevərlər yalnız Netflix, Disney+ kimi xarici platformalara deyil, həm də “Metaflix”  kimi yerli platformalara üz tutur.

“Metaflix” platformasının rəhbəri Yaşar Əhmədovla Azərbaycanda kino platformalarının inkişafı və şirkətin fəaliyyəti haqqında söhbət etdik.

- “Metaflix”in fəaliyyəti haqqında məlumat verə bilərsiniz?

Həm yerli, həm də xarici istehsalın məhsulu olan filmləri nümayiş etdirərək, qısa zamanda böyük izləyici kütləsinə sahib olmuşuq. “Metaflix” həm sayt (www.metaflix.az),  həm də mobil tətbiq olaraq fəaliyyət göstərir. Fəaliyyət göstərdiyimiz 1 il müddətində 10 000 abunə cəlb edə  bilmişik.

- Platformanızın məqsədi nədir?

Məqsədimiz ölkənin internet məkanında müasir kino və serial istiqamətində yerli istehsalçıları stimullaşdırmaq, bu çərçivədə yaradıcı qüvvələri fəaliyyətə cəlb etmək, gənclərin bu sahəyə olan marağını artırmaqdır.

- “Metaflix”də yayımlanan hansı film və serialları qeyd edə bilərsiniz?

Platformamızda yayımlanan “Geri dönənlər”, “Qayıdış”, “İstintaq” kimi filmlər, “Bir qadın”, “İntizar”, “Uçurum” kimi seriallar izləyicilərin böyük marağına səbəb olmuşdur. 

- İnsanlar bu filmləri necə izləyə bilər?

Platformaya abunə olmaq üçün izləyicilərə 1, 6 və 12 aylıq abunəlik paketləri təklif edirik. İzləyicilər uyğun paketi seçərək, onlayn ödəniş edib platformada yerləşən bütün film və serialları rahatlıqla izləyə bilirlər.

- Bəs ödənişi nə şəkildə alırsınız?

Ödəniş məsələsi ilə əlaqəli bir çox şirkətlə görüşlər keçirdik. Burada bizim üçün vacib olan təhlükəsiz və fasiləsiz olaraq abunəlik ödənişlərini ala bilmək idi. Abunəlik ödənişlərini dəstəkləyə bilən tək ödəniş sistemi Odero oldu. Odero Koç Holdinqin Azərbaycanda fəaliyyət göstərən onlayn ödəniş sistemidir. İzləyicilərimizin kart məlumatlarının təhlükəsizliyini təmin etmək üçün Oderonun Kart yadda saxlama (Card Storage) xidmətindən də istifadə edirik. Artıq izləyicilərimiz bir dəfə abunə olmaqla 7/24 platformamızdaki film və seriallara baxa bilirlər. 

- Yaşar bəy, platformanızda nə yeniliklər var?

Hal-hazırda romantik komediya janrında çəkilən “Evdə qalmış” filmini yalnız “Metaflix”ə abunə olaraq izləyə bilərsiniz. Qısa zamanda isə çoxdandır gözlənilən “Hozu Zona” və ilk yerli qorxu filmi olan “Xənnas” da platformamızda yayımlanacaq. Hər birinizə xoş izləmələr!